Бібліязмярканне для сапраўдных краязнаўцаў
19 красавіка з 16:00 да 19:00 у Навагрудскай раённай бібліятэцы адбудзецца незвычайнае і па-сапраўднаму феерычнае мерапрыемства – бібліязмярканне.
У аснову яго пакладзена квэст-гульня “Па старонках гісторыі Навагрудка”. Яна прымеркавана да 975-годдзя нашага любімага горада.
Запрашаем тых, хто мае глыбокія веды па гісторыі роднага краю, а таксама тых, у каго пакуль што ёсць толькі шчыры намер стаць сапраўдным краязнаўцам. Карацей, усіх патрыётаў Навагрудчыны.
Калі вы смелы і няўрымслівы чалавек, бібліязмярканне для вас. Тут трэба будзе выканаць сур’ёзныя заданні, адказаць на складаныя пытанні, а яшчэ разгадаць выкручастыя шарады і галаваломкі. Калі вы адчуваеце недахоп ведаў па гісторыі горада – гэта зусім не перашкода. У бібліятэцы няма нічога немагчымага. Бібліятэчнае змярканне схавае вас ад старонніх вачэй, і вы зможаце знайсці адказы на цяжкія пытанні ў кніжках, часопісах, каталогах, у тым ліку электронным. Нарэшце, не выключана магчымасць проста спытаць у бібліятэкара-усяведа. Галоўнае, дайсці да мэты квэст-гульні.
У праграме таксама настольныя гульні (“Нефармальныя славутасці”, «Гід па творчасці Адама Міцкевіча» і “Навагрудак ваяводскі”), канструктарскае бюро “Пабудуй свой горад”, слайд-прэзентацыі (“Мода Навагрудка 20-30-х гадоў ХХ стагоддзя”, “Навагрудак каталіцкі”) і яшчэ шмат чаго цікавага.
Напрыканцы ўсіх чакаюць салодкія пачастункі.
Чакаем вас па адрасе: вул 1 Мая, д.1, тэлефон для даведак 2-05-05.